საქართველოს შინაგან საქმეთა მინისტრმა, ვახტანგ გომელაურმა ზუგდიდში სამეგრელო-ზემო სვანეთის პოლიციის დეპარტამენტის დანაყოფების ხელმძღვანელებთან სამუშაო თათბირი გამართა. შეხვედრას ესწრებოდნენ მინისტრის მოადგილეები – გიორგი ბუთხუზი და ალექსანდრე დარახველიძე.
შსს-ს ინფორმაციით, შეხვედრაზე შინაგან საქმეთა მინისტრმა უწყების პრიორიტეტული მიმართულებები მიმოიხილა.
„ვახტანგ გომელაურმა სამუშაო თათბირზე რეგიონის პოლიციის დეპარტამენტის ხელმძღვანელი პირებისგან დანაშაულის წინააღმდეგ ბრძოლის მიმართულებით გატარებული საპოლიციო და პრევენციული ღონისძიებების შესახებ ინფორმაცია მოისმინა. შეხვედრაზე საუბარი რეგიონში დანაშაულის სტატისტიკას და გახსნის მაჩვენებელს შეეხო.
ვახტანგ გომელაურმა აღნიშნა, რომ შინაგან საქმეთა სამინისტრო განაგრძობს პოლიციელებისთვის, როგორც სოციალური, ისე სამუშაო პირობების გაუმჯობესებას“, – აღნიშნულია შსს-ს ინფორმაციაში.
რეგიონში ვიზიტის ფარგლებში ვახტანგ გომელაურმა მოადგილეებთან ერთად შეხვედრა გამართა საპატრულო პოლიციის დეპარტამენტის სამეგრელო-ზემო სვანეთის მთავარი სამმართველოს ხელმძღვანელ პირებთან და ამავე სამმართველოს თანამშრომლებთან.
შსს-ს ცნობით, ხელმძღვანელმა პირებმა შინაგან საქმეთა მინისტრს საზოგადოებრივი წესრიგის დაცვისა და მათ სამოქმედო ტერიტორიაზე საგზაო მოძრაობის უსაფრთხოების მიმართულებით არსებულ ვითარებაზე ინფორმაცია მიაწოდეს.
„შინაგან საქმეთა მინისტრმა პატრულ-ინსპექტორებს ზაფხულის სეზონთან დაკავშირებით რეგიონში ტურისტებისა და ადგილობრივი დამსვენებლებისთვის უსაფრთხო გარემოს უზრუნველყოფის მიზნით შესაბამისი დავალებები მისცა. ვახტანგ გომელაურმა სამართალდამცველებს დანაშაულის პრევენციისთვის, ასევე, რეგიონში მართლწესრიგისა და უსაფრთხოების დაცვისთვის მადლობა გადაუხადა“, – ნათქვამია შსს-ს ინფორმაციაში.