„ლეიბორისტული პარტიის“ თავმჯდომარე შალვა ნათელაშვილი 2024 წლის საპარლამენტო არჩევნების შემდეგ კოალიციური მთავრობის ჩამოყალიბებაზე საუბარს ამ ეტაპზე ნაადრევად მიიჩნევს, თუმცა გადაჭრით ამბობს, რომ „ქართულ ოცნებასთან“ კოალიცია გამორიცხულია, ხოლო დანარჩენებთან ალიანსში შესვლაზე იფიქრებს, მაგრამ მათთანაც „სერიოზული პრეტენზიები“ აქვს, რადგან „ფანჩატურში მარტო დატოვეს“.
„კონსტიტუციით აკრძალულია ალიანსების და ბლოკების შექმნა… როცა [არჩევნების] შედეგები დადგება, მერე ვიმსჯელოთ ამ კოალიციურ მთავრობაზე, სხვანაირად ისე გამოგვდის, რომ ბავშვი არ დაბადებულიყო და აბრაამს არქმევდნენო“, – განაცხადა შალვა ნათელაშვილმა ტელეკომპანია „ფორმულას“ პირდაპირ ეთერში გიორგი თარგამაძესთან სტუმრობისას.
მან „ქართულ ოცნებასთან“ კოალიცია გამორიცხა, თუმცა ისიც თქვა, რომ სხვებთანაც „სერიოზული პრეტენზიები“ აქვს.
„ქართულ ოცნებასთან“ კოალიცია გამორიცხულია. ოცნებასთან კოალიცია ექნება გლდანის წინასწარი გამოძიების იზოლატორს, დანარჩენები ვნახოთ არჩევნების შემდეგ, თუმცა დანარჩენებთანაც სერიოზული პრეტენზიები რომ მაქვს, იცით – როგორ დამტოვეს მარტო ფანჩატურში, როგორ გაემართნენ იქ, სადაც არაფერი უკეთებიათ“, – განაცხადა ნათელაშვილმა.