საქართველოს პრემიერ-მინისტრმა ირაკლი კობახიძემ სახელმწიფო უსაფრთხოების სამსახურის თანამშრომლებს ახალი უფროსი, ანრი ოხანაშვილი წარუდგინა.
მთავრობის მეთაურმა სუს-ის უფროსის თანამდებობაზე გაწეული საქმიანობისთვის მადლობა გადაუხადა გრიგოლ ლილუაშვილს.
“გასული ექვსი წელი იყო განსაკუთრებული სირთულეებით სავსე ჩვენი ქვეყნისთვის, იყო საგანგებო გამოწვევები, რომელთა წინაშეც იდგა ჩვენი ქვეყანა. ამ რთული გამოწვევების ფონზე ბატონი გრიგოლ ლილუაშვილი ძალიან დიდი ღირსებით, პროფესიონალიზმით და კეთილსინდისიერებით უძღვებოდა იმ საქმეს, რასაც ჩვენი ქვეყნის უსაფრთხოების უზრუნველყოფა ჰქვია. მინდა, კიდევ ერთხელ უდიდესი მადლობა გადავუხადო ბატონ გრიგოლ ლილუაშვილს, მისი ღვაწლისთვის და უმნიშვნელოვანესი საქმიანობისთვის, რომელსაც ის ახორციელებდა გასული ექვსი წლის განმავლობაში“, – განაცხადა პრემიერმა.
ირაკლი კობახიძემ სუს-ის ახალი ხელმძღვანელის მაღალ პროფესიონალიზმს გაუსვა ხაზი და ანრი ოხანაშვილს წარმატებები უსურვა.
“ანრი ოხანაშვილი მთელი ამ წლების განმავლობაში ერთგულად ემსახურებოდა სახელმწიფოს, ჩვენი ქვეყნის ინტერესებს. განსაკუთრებით, როდესაც ის მოღვაწეობდა საქართველოს პარლამენტში, იყო იურიდიული კომიტეტის ხელმძღვანელი, მოგვიანებით ის დაინიშნა საქართველოს იუსტიციის მინისტრად, სადაც, მიუხედავად იმისა, რომ ძალიან მცირე ხნის განმავლობაში მოღვაწეობდა, ძალიან მნიშვნელოვანი ცვლილებები განახორციელა. აბსოლუტურად დარწმუნებული ვარ, რომ ბატონი ანრი ოხანაშვილი იქნება ძალიან ღირსეული ხელმძღვანელი ამ უმნიშვნელოვანესი სამსახურის. მას აქვს ყველა თვისება იმისათვის, რომ ღირსეულად უხელმძღვანელოს სახელმწიფო სამსახურს. ის არის ნამდვილი პროფესიონალი, ღირსეული ადამიანი, კეთილსინდისიერი და ეს არის სწორედ ის თვისებები, რაც აუცილებელია იმ პოზიციის დასაკავებლად, რასაც სახელმწიფო უსაფრთხოების სამსახურის ხელმძღვანელობა ჰქვია“, – განაცხადა პრემიერმა.
მთავრობის მეთაურს გამოცხადებული ნდობისთვის მადლობა გადაუხადა სუს-ის ახალმა ხელმძღვანელმა. ანრი ოხანაშვილს და მის ახალ მოადგილეებს წარმატებები უსურვა სამსახურის ყოფილმა უფროსმა, გრიგოლ ლილუაშვილმა.