სასამართლოს ნებისმიერ გადაწყვეტილებას შევხვდები ძალიან მშვიდად, – ამის შესახებ „ლელოს“ წევრმა, მამუკა ხაზარაძემ სასამართლო სხდომის დაწყებამდე განაცხადა.
დღეს სასამართლო განიხილავს პროკურატურის შუამდგომლობას აღკვეთის ღონისძიებაზე, რომელიც მამუკა ხაზარაძის პარლამენტის საგამოძიებო კომისიაზე გამოუცხადებლობას ეხება.
„მინდა, გითხრათ რასთან გვაქვს საქმე. ეს არის იდეა, რომელიც ესმის ყველა პატრიოტ, ყველა პასუხისმგებლიან მოქალაქეს, ყველა ქართველს, ამ ქვეყნის მოქალაქეს, ვისთვისაც თავისუფლება, დემოკრატია და დამოუკიდებლობა არის ძალიან ღირებული. ამიტომ, სწორედ ეს იდეაა და ეს ბრძოლაა, რომელშიც მე ჩავერთე, ჩვენი ქვეყანა განვითარდეს ევროპული გზით, იყოს დამოუკიდებელი, ჰქონდეს ძალიან მძლავრი უსაფრთხოება, ჰყავდეს საერთაშორისო დემოკრატიული ქვეყნები, როგორც მეგობრები და იაროს ამ გზით. სწორედ ამ იდეის გამო ვდგავარ ახლა მე აქ და სწორედ ამ იდეის გამო არიან ის ახალგაზრდები, მეგობრები, რომლებსაც პიროვნულად არ ვიცნობ, რამდენიმეს გარდა. არ ვღალატობ იმ იდეას, რის გამოც ჩემი მეგობარი, ვეფხო კასრაძე, ხუთი შვილის მამა, დღეს იხდის სასჯელს აბსოლუტურად დაუმსახურებლად. ამ იდეის გამო არის ეს ბრძოლა. ამ იდეის გამო შემოვედი მე პოლიტიკაში და არ ავირჩიე სხვა გზა დღეს როგორი გადაწყვეტილებაც არ უნდა მიიღოს სასამართლომ, დარწმუნებული ვარ, რომ ყველა ადამიანს ერთი სული აქვს, რომ ეს ქვეყანა დაადგეს ნორმალური განვითარების გზას. წავართვათ ბიძინა ივანიშვილს მიტაცებული ქვეყანა, მიტაცებული სასამართლო, მიტაცებული პროკურატურა, თუ ყველა უწყება და რაც ყველაზე მთავარია, წავართვათ იმის საშუალება, რომ ეს ქვეყანა გადააბაროს რუსებს. ამიტომ, აქ მამუკა ხაზარაძეზე არ არის საუბარი, აქ არის საუბარი სწორედ ამ იდეაზე, ამ მიზანზე, რომ ჩვენი ქვეყანა იყოს დამოუკიდებელი, თავისუფალი, მტკიცე მშვიდობით და განვითარების გზაზე დაყენებული. ასე რომ, ეს ყველაფერი ემსახურება ამას. გადაწყვეტილება, რაც იქნება მიღებული, შევხვდები ძალიან მშვიდად“, – განაცხადა ხაზარაძემ.