მამუკა ხაზარაძეს გუშინ ვერაფრით ათქმევინეს, რომ მეც პოლიტპატიმარი ვარ, ამის მიუხედავად, მამუკა ხაზარაძე მიმაჩნია პოლიტპატიმრად, – ამის შესახებ საქართველოს ყოფილმა პრეზიდენტმა, მიხეილ სააკაშვილმა დღევანდელ სასამართლო პროცესზე დისტანციურად ჩართვისას განაცხადა.
სააკაშვილის თქმით, სოლიდარობას უცხადებს იმ ადამიანებს, „რომლებიც უკანონოდ, უსამართლოდ არიან დაკავებული“.
„სპეციალურად მოხდა პროცესების გადაფარვა, ხაზარაძე-ბადრი ჯაფარიძის და ჩემი პროცესების, რათა ხალხმა არ გაიგოს სიმართლე. მიუხედავად იმისა, რომ გუშინ ვერაფრით ათქმევინეს მამუკა ხაზარაძეს, რომ მეც პოლიტპატიმარი ვარ, მე მამუკა ხაზარაძე მიმაჩნია პოლიტპატიმრად. პოლიტიკური დევნაა, რაც მის და ბადრი ჯაფარიძის მიმართ ხდება. ისევე როგორც, მინდა, გამოვხატო ჩემი სოლიდარობა იმ ბიჭებისა და ქალბატონების მიმართ, რომლებიც უკანონოდ არიან დაკავებული, რომლებიც უკანონოდ, უსამართლოდ ჰყავთ დაკავებული, იმყოფებიან პოლიტიკური დევნის ქვეშ და არიან პოლიტიკური პატიმრები“, – განაცხადა მიხეილ სააკაშვილმა.
ამასთან, როგორც სასამართლო პროცესზე დისტანციურად ჩართვისას სააკაშვილმა აღნიშნა, „თუ ვინმე ამბობს, რომ სააკაშვილი არ არის პოლიტპატიმარი, ეს მის სინდისსა და რეპუტაციაზე იყოს“.