GUARDIANGE – თეთრი სახლის პრესმდივანმა, ქეროლაინ ლივიტმა განაცხადა, რომ ამერიკის შეერთებული შტატების პრეზიდენტი დონალდ ტრამპი იმედგაწბილებულია როგორც რუსეთის პრეზიდენტით, ვლადიმერ პუტინით, ასევე, უკრაინის პრეზიდენტით, ვოლოდიმირ ზელენსკით.
ლევიტმა ჟურნალისტებს უთხრა, რომ ომი ძალიან დიდხანს გრძელდება, რის გამოც ორივე მხარეს ბევრი ადამიანი იღუპება.
„დონალდ ტრამპი ორივე ლიდერით იმედგაწბილებულია. მას სურს, რომ ეს ომი დასრულდეს. ორივე მხარეს იღუპებიან ადამიანები და ეს უკვე ძალიან დიდი ხანია, გრძელდება. ჩვენი გუნდი განაგრძობს თანამშრომლობას როგორც რუსებთან, ისე უკრაინელებთან და პრეზიდენტი ძალიან აქტიურად არის ჩართული ამ საკითხში ყოველდღიურად“, – თქვა თეთრი სახლის პრესმდივანმა.
უფრო ადრე, თავად ტრამპმა განაცხადა, რომ ვლადიმერ პუტინზე გაბრაზებულია და თუკი უკრაინასთან დაკავშირებით სამშვიდობო შეთანხმება არ იქნება მიღწეული, რუსულ ნავთობზე ტარიფებს დააწესებს.
„ენბისი ნიუსთან“ ინტერვიუში აშშ-ის პრეზიდენტმა თქვა: „მე ძალიან გავბრაზდი, როცა პუტინმა ზელენსკის სანდოობასა და უკრაინის ახალ ხელმძღვანელობაზე დაიწყო საუბარი. პუტინმა იცის, რომ გაბრაზებული ვარ, მაგრამ მასთან ძალიან კარგი ურთიერთობა მაქვს და ბრაზი სწრაფად გაქრება, თუ ის სწორად მოიქცევა. მე და რუსეთი თუ ვერ მოვახერხებთ შეთანხმებას უკრაინაში სისხლისღვრის შეჩერებაზე და თუ ვიფიქრებ, რომ ეს რუსეთის ბრალი იყო, რაც შეიძლება, არც იყოს, მაგრამ თუ ვფიქრობ, რომ ეს რუსეთის ბრალი იყო, ნავთობზე მეორად ტარიფებს დავაწესებ – რუსეთიდან გამოსულ ყველა სახის ნავთობზე. ეს იქნება ის, რომ თუ ნავთობს იყიდი რუსეთიდან, შეერთებულ შტატებში ბიზნესს ვერ აწარმოებ. ყველა სახის ნავთობზე იქნება 25-პროცენტიანი ტარიფი“.