„კოალიცია ცვლილებებისთვის“ ერთ-ერთი ლიდერი ნიკა მელია აცხადებს, რომ ჯოზეფ ბორელისა და ევროკავშირის წევრი ქვეყნების საგარეო საქმეთა მინისტრებისადმი ოთხი ოპოზიციური გაერთიანების წერილი არათუ არ დააზიანებს სახელმწიფო ინტერესს, არამედ ჩიხური მდგომარეობიდან გამოსავლის ძიებას ემსახურება.
„არათუ არ დააზიანებს, არამედ სახელმწიფო ინტერესს ატარებს ამ შინაარსის განცხადება, წერილი. დიახაც, ის, რომ არჩევნები გაყალბდა, არა მხოლოდ თბილისში, ვაკეში ან საქართველოში, არამედ საერთაშორისო დონეზეა ცნობილი ყველასთვის, აშშ-ისთვის, ევროკავშირისთვის, დიდი ბრიტანეთისთვის. ოპოზიციური პარტიების მხრიდან კიდევ ერთხელ ხაზგასმა აქცენტირებულად ამ საკითხზე არათუ არ დააზიანებს, არამედ ამ ჩიხური მდგომარეობიდან გამოსავლის ძიებას ემსახურება და რატომ არის ეს ვინმესთვის გასაკვირი ამ ქვეყანაში, ეს უფრო გასაკვირია ჩემთვის“, – უთხრა მელიამ ჟურნალისტებს.
კოალიცია „ცვლილებებისთვის“, „ერთიანობა ნაციონალური მოძრაობა“, „ძლიერი საქართველო“, პარტია „საქართველოსთვის“ 26 ოქტომბრის საპარლამენტო არჩევნებთან დაკავშირებით ევროკავშირის საგარეო და უსაფრთხოების საკითხებში ევროკავშირის უმაღლეს წარმომადგენელს, ჯოზეფ ბორელს და ევროკავშირის წევრი ქვეყნების საგარეო საქმეთა მინისტრებს წერილით მიმართავენ.
წერილში აღნიშნულია, რომ 26 ოქტომბრის საპარლამენტო არჩევნებზე საარჩევნო გაყალბებისა და მანიპულაციის მასშტაბი უპრეცედენტო იყო და აქედან გამომდინარე, ოპოზიციის მოთხოვნა ცალსახაა – ახალი არჩევნები ჩატარდეს 2025 წელს გაუმჯობესებულ საარჩევნო გარემოში, პოლიტიკურად დაბალანსებული საარჩევნო ადმინისტრაციითა და პოლიტიკურად ნეიტრალური სახელმწიფო ინსტიტუტებით.
რადიკალურმა ოპოზიციამ ბრიუსელს მიმართა, ეს არის სერგო ორჯონიკიძის გზავნილი საუკუნის თავზე, ოღონდ არა მოსკოვს, არამედ ამ შემთხვევაში ბრიუსელს, – ამის შესახებ პრემიერ-მინისტრმა ირაკლი კობახიძემ მთავრობის დღევანდელ სხდომაზე, ოპოზიციის მიერ ევროკავშირის საგარეო საქმეთა მინისტრებთან გაგზავნილ წერილთან დაკავშირებით განაცხადა.