GUARDIANGE – ნებისმიერი ფრანგი სამხედრო ინსტრუქტორი უკრაინაში იქნება „კანონიერი სამიზნე“ რუსეთის შეიარაღებული ძალებისთვის, განაცხადა რუსეთის საგარეო საქმეთა მინისტრმა, სერგეი ლავროვმა, 4 ივნისს, აფრიკის ტურნეს დროს, სადაც დასავლეთთან იმედგაცრუებამ რამდენიმე ქვეყანას მოსკოვისკენ ააღებინა გეზი.
ლავროვმა ეს განცხადება კონგოს რესპუბლიკის საგარეო საქმეთა მინისტრთან ჟან კლოდ გაკოსოსთან ერთობლივ პრესკონფერენციაზე გააკეთა.
„რაც შეეხება ფრანგ ინსტრუქტორებს, ვფიქრობ, ისინი უკვე უკრაინის ტერიტორიაზე იმყოფებიან“, – განაცხადა ლავროვმა, იმ სამხედრო ინსტრუქტორებზე, რომლებსაც საფრანგეთი უკრაინელი სამხედროების წვრთნებისთვის გასაგზავნად ამზადებს. „მიუხედავად მათი სტატუსისა, სამხედრო ჩინოვნიკები ან დაქირავებული ჯარისკაცები წარმოადგენენ ლეგიტიმურ სამიზნეს ჩვენი შეიარაღებული ძალებისთვის“, – თქვა ლავროვმა.
უკრაინის უმაღლესმა მეთაურმა გასულ კვირას განაცხადა, რომ ხელი მოაწერა დოკუმენტებს, რომლითაც ფრანგ სამხედრო ინსტრუქტორებს უკრაინულ საწვრთნელ ცენტრებში შესვლის უფლება მიეცათ. მაგრამ საფრანგეთის პრეზიდენტმა ემანუელ მაკრონმა გასულ კვირას აღნიშნა, რომ არ გააკეთებს კომენტარს „ვარაუდებსა ან გადაწყვეტილებებზე, რომლებიც შეიძლება მიღებულ იქნას“. მან თქვა, რომ კვირის ბოლოს, D-Day-ის 80 წლის იუბილეზე დეტალურად ისაუბრებს საფრანგეთის მხარდაჭერაზე.
მაკრონის ოფისმა განაცხადა, რომ არ გააკეთებს კომენტარს ლავროვის გამონათქვამებზე. ასევე 4 ივნისს, კრემლის პრესსპიკერმა დიმიტრი პესკოვმა თქვა, რომ „ინსტრუქტორებს, რომლებიც კიევის რეჟიმის ჯარებს წვრთნიან, არანაირი იმუნიტეტი არ აქვთ და არ აქვს მნიშვნელობა არიან ისინი ფრანგები თუ არა“.
ლავროვი აფრიკის კონტინენტს ბოლო რამდენიმე წლის განმავლობაში რამდენჯერმე ესტუმრა, რადგან რუსეთი ცდილობს მხარდაჭერა მოიპოვოს უკრაინაში მოსკოვის სრულმასშტაბიანი შეჭრის ფონზე. ბოლო წლებში აფრიკის რამდენიმე ქვეყანა გამოთქვამს მზარდ იმედგაწბილებას მათი ისეთი ტრადიციული დასავლელი პარტნიორების მიმართ, როგორიცაა საფრანგეთი და შეერთებული შტატები. ზოგიერთმა მათგანმა სანაცვლოდ რუსეთს მიმართა და ისლამური ამბოხებების წინააღმდეგ ბრძოლაში დახმარება სთხოვა.
ლავროვმა 4 ივნისს ასევე არაფრად ჩააგდო უკრაინის სამშვიდობო კონფერენცია, რომელიც ამ თვის ბოლოს შვეიცარიაში უნდა გაიმართოს. რუსეთი ამ კონფერენციაზე არ არის მიწვეული.
„შვეიცარიაში ამ კონფერენციას აზრი არ აქვს. ერთადერთი აზრი, რომელიც მას შეიძლება ჰქონდეს, არის ამ ანტირუსული ბლოკის შენარჩუნების მცდელობა, რომელიც დაშლის პროცესშია“, – განაცხადა რუსეთის საგარეო საქმეთა მინისტრმა.
კონგოს რესპუბლიკა იყო ლავროვის ტურნეს მეორე გაჩერება. იგი 3 ივნისს გვინეას ესტუმრა და საგარეო საქმეთა მინისტრს შეხვდა.
სამშაბათს, 4 ივნისს, გვიან, ის ბურკინა ფასოს დედაქალაქ ოუაგადუგუს აეროპორტში ჩაფრინდა, როგორც ეს ქვეყნის ხელისუფლების მიერ სოციალურ მედიაში გამოქვეყნებულ განცხადებაშია აღნიშნული. ლავროვი 5 ივნისს უნდა შეხვდეს კაპიტან იბრაჰიმ ტრაორეს, ქვეყნის ლიდერს, რომელმაც ხელისუფლება 2022 წლის სამხედრო გადატრიალების შემდეგ მოიპოვა. მას ჩადში ოთხშაბათს ნაშუადღევს ელოდებიან, ნათქვამია ქვეყნის ხელისუფლების განცხადებაში.