დღევანდელმა დღემ აჩვენა, რომ ეს ე.წ პოლარიზაცია სინამდვილეში არის აბსოლუტურად ხელოვნური; როდესაც კეზერაშვილისგან იღებ ხელფასს, ხაზარაძისგან და გვარამიას ხაზიდან, რა თქმა უნდა, ის ჟურნალისტი არ არის და ამიტომ იქცევა ეს ადამიანი, როგორც არაჟურნალისტი, – ამის შესახებ საქართველოს პრემიერ-მინისტრმა ირაკლი კობახიძემ საზოგადოებრივ-პოლიტიკური თოქ-შოუების წამყვანებთან შეხვედრისას განაცხადა.
მთავრობის მეთაურის შეფასებით, აბსოლუტურად გაუგებარია, როცა ჟურნალისტი კითხვას სვამს და პასუხს არ ელოდება.
„როდის გახსოვთ თქვენ მათგან ჟურნალისტური მოქცევა. ის არ არის სირცხვილი, რომ კეზერაშვილისგან იღებს ადამიანი ხელფასს და გონორით გელაპარაკებათ თქვენ? რა თქმა უნდა, სირცხვილია. ხაზარაძე, კეზერაშვილი, გვარამია, სამი სახე ამ ტელევიზიის, სამივე პირდაპირ უხეშად იყო ჩართული ბიზნესის რეკეტში. ამიტომ არის პოლარიზაცია. სამი რეკეტიორის წარმომადგენელი რომ გიზის მაგიდასთან, იქ რა თქმა უნდა, პოლარიზაცია გარდაუვალია. მათ სხვანაირად რესურსიც არ აქვთ, ხელოვნური ქარიშხალი ჭიქაში უნდა დაატრიალონ, სხვანაირად თავი როგორ უნდა დაიცვას კეზერაშვილისგან ხელფასის მიმღებმა ე.წ ჟურნალისტმა, ან ვინც ხაზარაძისგან, გვარამიასგან ან ვიღაცისგან იღებს ხელფასს. მათ რესურსი არ აქვთ, რომ სხვანაირად თავი დაიცვან, არ უნდა მოგცენ პასუხის გაცემის საშუალება, ხელოვნურად უნდა აჭრან დისკუსია. თუ ჟურნალისტი გქვია, რანაირი ჟურნალისტი ხარ, კითხვას სვამ და პასუხს არ ელოდები. აბსოლუტურად გაუგებარია. აქედან ჩანს, რომ ისინი არიან არა ჟურნალისტები, არამედ კონკრეტული პოლიტიკური პარტიის წარმომადგენლები, რასაც ჰქვია კოლექტიური „ნაცმოძრაობა“. ეს არის პრობლემა. სხვა გზა არ აქვს კეზერაშვილს, ხაზარაძეს და გვარამიას, ასე უნდა მოიქცნენ, სხვა რესურსი მათ უბრალოდ არ აქვთ“, – განაცხადა პრემიერმა და აღნიშნა, რომ კანონთან დაკავშირებით მათ ვერც ერთი კითხვა ვერ დასვეს.
კობახიძის შეფასებით, ჩვენ ხელოვნურად გვაცხოვრებენ ამ ჩაკეტილ პოლარიზაციის წრეში და „ნაცმოძრაობის“ ოპოზიციად დატოვება ხელოვნურად ქვეყანაში, ბუნებრივია, გულისხმობდა პოლარიზაციის ჩაკეტილ წრეში დარჩენას.
„დამნაშავეები დაგვიტოვეს ხელოვნურად. არც ერთი დამნაშავე არ უნდა დაისაჯოს, პირდაპირი შანტაჟის დონეზე კეთდებოდა განცხადებები. 2012 წლის შემდეგ პირდაპირ უკრძალავდნენ 2013-2014 წლებში ხელისუფლებას, რომ სამართალი აღესრულებინა კონკრეტული დამნაშავეების, უმძიმესი დამნაშავეების მიმართ და ხელოვნურად დაგვიტოვეს ეს ე.წ პოლარიზაცია, რასაც სინამდვილეში ჰქვია რადიკალიზმი. ხელოვნური პოლარიზაციის მთავარი სათავე, გაუმჭვირვალობასთან ერთად სწორედ ეს არის – ის, რომ ჩვენ ეს დამნაშავე პოლიტიკური ძალა, „ნაცმოძრაობა“ ხელოვნურად დაგვინიშნეს აქ ოპოზიციად. როგორც ადრე დაგვინიშნეს ვიღაცებმა ხელისუფლებად, ასე დაგვიტოვეს და დაგვინიშნეს მერე ოპოზიციად. ეს, რა თქმა უნდა, მუდმივ პოლარიზაციაში ტოვებს ქვეყანას“, – განაცხადა პრემიერმა.