შალვა პაპუაშვილი: ერთადერთი, რაც ევროკავშირის ღირებულებასთან შეუთავსებელია, ეს არის „ევროპის დემოკრატიის ფონდის“ მიერ საქართველოში ფულის ფარული ხარჯვა სპეცსამსახურების მეთოდებით

ერთადერთი რამ, რაც შეუთავსებელია ევროკავშირის ღირებულებასთან, ეს არის „ევროპის დემოკრატიის ფონდის“ მიერ საქართველოში ფულის ფარული ხარჯვა. ამის შესაცვლელად ევროკავშირი არაფერს აკეთებს, – ამის შესახებ საქართველოს პარლამენტის თავმჯდომარემ შალვა პაპუაშვილმა ბრიფინგზე განაცხადა.

„ერთი წელი, მე ამაზე მქონდა საუბარი, მათ შორის ევროკომისიის წარმომადგენლებს, საელჩოებს, ელჩს, ყველას მივმართე ამასთან დაკავშირებით, რომ შეუთავსებელია, ევროკავშირის ღირებულებებთან უცხო ქვეყანაში სპეცსამსახურების მეთოდით ფულის ფარული ხარჯვა, რადიკალური ოპოზიციისა და ჯგუფების დაფინანსება. ამ საკითხებზე მაღალი დონის რიგ წარმომადგენლებთან დახურულ კარს მიღმა ვთანხმდებით, რომ „ევროპის დემოკრატიის ფონდის“ დაფინანსების პრინციპები ეწინააღმდეგება ამ ღირებულებებს ორი მიზეზის გამო. ერთი, რომ ის არის ფარული და არ საჯაროვდება და მეორე, რომ შინაარსშიც ჩვენ რამდენიმე შემთხვევაზე გვქონდა მსჯელობა და შევთანხმდით იმაზე, რომ ნამდვილად, ეს იყო გადაცდომა, უფრო სწორად, ეს იყო ისეთი ხარჯვა, რომელშიც ჩადებული პოლიტიკური მიზნები. ერთ-ერთი ასეთი მაგალითი არის „დროა“, რომელიც არის პირდაპირი პოლიტიკური ფულად კონვერტირებული ვითომ დახმარების ფული.

რაც შეეხება მოწოდებებს, რომელიც გვესმის ევროკავშირის წარმომადგენლობისგან, საელჩოებისგან, თუ სხვადასხვა ქვეყნისგან ღირებულებებთან დაკავშირებით, თუკი ღირებულებები მათთვის მართლაც ფასეულია, ერთადერთი, რაც ეწინააღმდეგება ამ მთლიან ისტორიაში ევროპულ ღირებულებებს, ეს არის „ევროპის დემოკრატიის ფონდის“ მიერ საქართველოში ფულის ფარული ხარჯვა სპეცსამსახურების მეთოდებით, რაც უნდა შეწყდეს. ევროკავშირის სხვადასხვა სტრუქტურას შეუძლია, რომ ეს გააკეთოს, მაგრამ, სამწუხაროდ, ამჯობინებენ, ქართული საზოგადოება მიიყვანონ ისტერიამდე, საზოგადოება აჩხუბონ ერთმანეთთან, მათ შორის იმით, რომ დაბრენდონ ეს კანონპროექტი, თითქოს არის ანტიევროპული. სინამდვილეში, ნაცვლად იმისა, რომ ხუთი წუთი დახარჯონ და EED-ის ფონდის დაფინანსებები გაასაჯაროონ. რატომ მალავენ EED-ის დაფინანსებას. ეს მარტივი კითხვაა, რომელსაც როგორც ჩანს, მარტივი პასუხი არ აქვს და ზოგიერთ აქტორს ურჩევნია, აირიოს სიტუაცია საქართველოში, ვიდრე ის, რომ გასაჯაროვდეს, ვის, რას და რატომ აფინანსებენ „ევროპის დემოკრატიის ფონდი“ და „ამერიკის დემოკრატიის ნაციონალური ფონდი“, – განაცხადა შალვა პაპუაშვილმა.