კანონპროექტი პარლამენტის წევრების – ალექსანდრე რაქვიაშვილის, იაგო ხვიჩიას, ჰერმან საბოს და ვახტანგ მეგრელიშვილის საკანონმდებლო ინიციატივაა.
პროექტის თანახმად, პოლიტიკური პარტიები არ იქნებიან ვალდებულნი თავიანთი საარჩევნო სია დააკომპლექტონ გენდერული კვოტირების მოთხოვნების შესაბამისად.
საპარლამენტო პოლიტიკური ჯგუფი „გირჩის“ წევრები მიიჩნევენ, რომ გენდერული კვოტირების მექანიზმი წარმოადგენს შეზღუდვას როგორც პოლიტიკური პარტიებისთვის, ასევე იმ სქესის წარმომადგენლებისთვის, ვისი გაძლიერების მოტივითაც შეიქმნა ეს ნორმა.
მათივე განმარტებით, სქესის მიხედვით პოლიტიკური პარტიის სიის ფორმირებას ლოგიკური შინაარსი არ გააჩნია და ასეთი ხელოვნური ჩარევით ქალების პოლიტიკაში ჩართულობა სერიოზულ სახეს ვერასოდეს მიიღებს.
კანონპროექტის ერთ-ერთი ავტორისა და ინიციატორის, ალექსანდრე რაქვიაშვილის განცხადებით, კანონპროექტის მიზანია დაეხმაროს პოლიტიკით დაინტერესებულ ქალებს, თავი დააღწიონ კვოტით გამოწვეულ რეპუტაციულ ზიანს, რადგან სქესის ნიშნით კვოტირება კიდევ უფრო აღრმავებს ქალების მიმართ არსებულ სტერეოტიპებს, რის გამოც რთულია ქალების სათანადო პოლიტიკურ მოთამაშეებად აღქმა.
როგორც კომიტეტის თავმჯდომარე რატი იონათამიშვილმა აღნიშნა, კვოტირების მექანიზმი არის პოზიტიური დისკრიმინაციის ფორმა.
„თუ ჩვენ ვსაუბრობთ ქალთა უფლებებზე, მოგიწოდებთ, რომ კომიტეტში ვისაუბროთ და ამასთან დაკავშირებით გვქონდეს აქტიური კონსულტაციები. ბევრი მნიშვნელოვანი საკითხია, რომელზეც კომიტეტი მუშაობს, იქნება ეს სექსუალური შევიწროების თუ ეკონომიკური გაძლიერების საკითხები. ჩვენი არჩევანი პასუხისმგებლობა უნდა იყოს და ჩვენი პარტიის არჩევანი ზუსტად ქალთა ჩართულობის თვალსაზრისით იქნება პასუხისმგებლობიანი გადაწყვეტილება“, – განაცხადა რატი იონათამიშვილმა.
კომიტეტმა მხარი დაუჭირა კანონპროექტს.