„მეგობარი აქტი“ ქართველი ხალხის პასუხია ყველა პოლიტიკურ დანაშაულზე, რაც „რუსულმა ოცნებამ“ ბოლო 13 წელიწადში ჩაიდინა. უკვე ცხადია, რომ ყველა ამ დანაშაულზე პასუხისმგებლობა დადგება, – ამის შესახებ პარტია „ლელოს“ ლიდერი მამუკა ხაზარაძემ სოციალურ ქსელში წერს.
მისი შეფასებით, „ქართული ოცნება“ „ქართულ კოშმარად“ იქცა.
„MEGOBARI Act, რეალურად ქართველი ხალხის პასუხია ყველა იმ პოლიტიკურ დანაშაულზე, ძალადობასა და რეპრესიებზე, რაც „რუსულმა ოცნებამ“ ბოლო 13 წელიწადში საქართველოში ჩაიდინა. კი, „ქართული ოცნება“ ნამდვილად იქცა „ქართულ კოშმარად“, როდესაც ღირსება აყარა სასამართლოს; მოკლა ინსტიტუციები; ფიზიკურად იძალადა ხალხზე; დაუპირისპირდა სამოქალაქო საზოგადოებას; დაარღვია კონსტიტუცია და უარი თქვა ევროპულ კურსზე;
დაგვიკარგა ეკონომიკური სტაბილურობისა და უსაფრთხოების გარანტია, რასაც ანაკლიის პორტი გვაძლევდა.
დღეს უკვე ცხადია, რომ ყველა ამ დანაშაულზე პასუხისმგებლობა დადგება და MEGOBARI Act სწორედ ამის წინაპირობაა!
გზავნილი მიღებულია – ნამდვილი მეგობრები მათ გვერდთ დგანან, ვინც თავისუფლებისა და ღირსებისთვის იბრძვის და არა მათთან, ვინც შიშითა და რეპრესიებით ებღაუჭება ძალაუფლებას“, – წერს ხაზარაძე სოციალურ ქსელში.
აშშ-ის კონგრესის წარმომადგენელთა პალატამ „მეგობარი აქტს“ მხარი დაუჭირა. კანონპროექტის მომხრე 349 კონგრესმენი იყო, მათგან 168 რესპუბლიკელი, ხოლო 181 დემოკრატი. წინააღმდეგ წავიდა 42 კონგრესმენი, ხოლო 42-ს კენჭისყრაში მონაწილეობა არ მიუღია.