წლების განმავლობაში, ჩვენ ვხედავდით პირდაპირი, უხეში ჩარევის მცდელობას სასამართლო დამოუკიდებლობაში, იყო რამდენიმე გახმაურებული შემთხვევა, ასეთი ფაქტები, რა თქმა უნდა, კატეგორიულად მიუღებელია. ქართული მართლმსაჯულების დამოუკიდებლობაში უხეშად ჩარევის საშუალებას ვერავის მივცემთ, – ამის შესახებ საქართველოს პრემიერ-მინისტრმა, ირაკლი კობახიძემ უზენაეს სასამართლოში, მოსამართლეებთან და იუსტიციის უმაღლესი საბჭოს წევრებთან შეხვედრისას განაცხადა.
როგორც მთავრობის მეთაურმა აღნიშნა, იყო რამდენიმე გახმაურებული შემთხვევა. ირაკლი კობახიძემ გაიხსენა მოსამართლე ჩხიკვაძის საქმე, რომელსაც აშშ-ის ყოფილი ადმინისტრაციის წარმომადგენელმა მოსთხოვა ანგარიში კონკრეტულ საქმეზე.
კობახიძის თქმით, მოგვიანებით, ასევე სტრასბურგის სასამართლომ დაადასტურა, რომ მოსამართლე ჩხიკვაძის მიერ მიღებული გადაწყვეტილება, რასთან დაკავშირებითაც მას მოსთხოვეს ანგარიში, სამართლიანი იყო.
„ყველას ძალიან კარგად გვახსოვს რამდენიმე გახმაურებული შემთხვევა, მაგალითად, მოსამართლე ჩხიკვაძის საქმე, როდესაც კონკრეტულ მოსამართლეს მოსთხოვეს ანგარიში კონკრეტულ საქმეზე. ეს არის ქმედება, რომელსაც პირდაპირ კრძალავს საქართველოს კონსტიტუცია. კონკრეტული საელჩოს წარმომადგენელი მივიდა მოსამართლესთან და მას მოსთხოვა ანგარიში კონკრეტულ საქმესთან დაკავშირებით, საუბარია აშშ-ის ყოფილი ადმინისტრაციის წარმომადგენელზე. დღეს უფრო ადვილია საუბარი ამ თემაზე, გამომდინარე იქიდან, რომ ჩვენ ვსაუბრობთ ყოფილ ადმინისტრაციაზე, რომელსაც დღეს უკვე აშშ-ის მოქმედი ხელისუფლება აკრიტიკებს, პირველ რიგში, სწორედ, დემოკრატიის მიმართულებით და სხვა სახელმწიფოების სუვერენიტეტის მიმართულებით არასწორ, უხეშ ქმედებებში. რეალურად, ამას ჩვენ ვხედავდით ჩვენი ქვეყნის მაგალითზე. ყოფილი ადმინისტრაციის კონკრეტული წარმომადგენელი შეხვდა მოსამართლეს, მას მოსთხოვა ჩვენი ქვეყნის კონსტიტუციის წინააღმდეგ ანგარიში კონკრეტულ საქმესთან დაკავშირებით. ასევე , საინტერესო დეტალი არის ის, რომ ამ საქმის გამო მოსამართლეს ერთგვარი სანქცია დააკისრეს – მას ვიზიტი გაუუქმეს. ესეც არის თავისთავად საინტერესო, ერთგვარი აღიარება იყო ეს ყველაფერიც, ვიზიტები განიხილება, როგორც ზემოქმედების ინსტიტუტი მოსამართლეების მიმართ. ეს არის აბსოლუტურად მიუღებელი პრაქტიკა, რასაც ჩვენ უნდა დავუპირისპირდეთ. ეს საქმე მოგვიანებით წავიდა სტრასბურგის სასამართლოში და სტრასბურგის სასამართლომ დაადასტურა, რომ მოსამართლე ჩხიკვაძის მიერ მიღებული გადაწყვეტილება, რასთან დაკავშირებითაც მას მოსთხოვეს ანგარიში, იყო აბსოლუტურად სამართლიანი, თუმცა ფაქტი რჩება ფაქტად – მიღებული იყო სამართლიანი გადაწყვეტილება, მოსამართლეს მოსთხოვეს ანგარიში და დასაჯეს ვიზიტის გაუქმებით. ასეთი ფაქტები, რა თქმა უნდა, კატეგორიულად მიუღებელია, ჩვენ ვერავის მივცემთ საშუალებას, ასე უხეშად სცადონ შეჭრა ქართული მართლმსაჯულების დამოუკიდებლობაში. ქართული სასამართლო უნდა იყოს დამოუკიდებელი, არის დამოუკიდებელი და მომავალშიც აუცილებლად იქნება დამოუკიდებელი“, – განაცხადა პრემიერმა.