სანქციები არის საერთაშორისო თანამეგობრობის მკაფიო სიგნალი, რომ ძალადობა, უკანონო დაპატიმრებები და რეჟიმის რეპრესიები დაუსჯელი არ დარჩება, – ამის შესახებ აღნიშნულია „სტრატეგია აღმაშენებლის“ ლიდერის, გიორგი ვაშაძის განცხადებაში, რომელსაც პარტიის პრესსამსახური ავრცელებს.
მისი თქმით, თავისუფალი საქართველოს ერთადერთი არჩევანი და გამარჯვების გზა – მეტი ევროპა, მეტი დაცულობა, მეტი ინვესტიციაა.
„სანქციები, რომლებიც გუშინ ვიხილეთ, ქართველი ხალხის უწყვეტი პროტესტის შედეგია. ეს არის საერთაშორისო თანამეგობრობის მკაფიო სიგნალი – ძალადობა, უკანონო დაპატიმრებები და რეჟიმის რეპრესიები დაუსჯელი არ დარჩება. ივანიშვილის რეჟიმი არის მთავარი საფრთხე და მისი პროპაგანდისტების ზღაპრები გამოგონილ მტრებზე და წულუკიანის ღალატის კომისიის ისტორიის შეცვლის მცდელობა, ამ რეალობას ვერ შეცვლის. რეჟიმის ირგვლივ რკალი ვიწროვდება, ყველა ხვდება, რომ ივანიშვილი საქართველოს მარტოს ტოვებს, დაუცველს, სადაც მხოლოდ სიღარიბე და სანქციებია. ჩვენი გზა – მეტი ევროპა, მეტი დაცულობა, მეტი ინვესტიცია. ეს არის თავისუფალი საქართველოს ერთადერთი არჩევანი და გამარჯვების გზა“, – განაცხადა გიორგი ვაშაძემ.