სომხეთსა და აზერბაიჯანს შორის სამშვიდობო პროცესს დიდი მნიშვნელობა აქვს, – ამის შესახებ გერმანიის პრეზიდენტმა, ფრანკ-ვალტერ შტაინმაიერმა, აზერბაიჯანში ვიზიტისას განაცხადა.
გერმანიის პრეზიდენტის თქმით, ეს არის მნიშვნელოვანი მომენტი შეთანხმების მისაღწევად.
„იმედი მაქვს, რომ ეს მომენტი გამოყენებული იქნება სამშვიდობო ხელშეკრულების გასაფორმებლად და თქვენს რეგიონში ჭეშმარიტად ხანგრძლივი მშვიდობა დამყარდება. ამის დიდი იმედი მაქვს. გერმანია მზადაა, უზრუნველყოს საჭირო მხარდაჭერა ამ პროცესში“, – აღნიშნა გერმანიის პრეზიდენტმა.
ფრანკ-ვალტერ შტაინმაიერმა ასევე ყურადღება გაამახვილა შუა დერეფნის მნიშვნელობაზე და აღნიშნა, რომ შუა დერეფანი საინტერესო პერსპექტივაა გერმანიის ეკონომიკისთვისაც.
გერმანიის პრეზიდენტის თქმით, აზერბაიჯანი ხდება ადგილი, სადაც მსოფლიოს მთავარი სავაჭრო გზები ერთმანეთს ხვდება.
„ჩვენ ორივე დაინტერესებული ვართ ეკონომიკური და სავაჭრო ურთიერთობებით არა მხოლოდ ცენტრალურ აზიასთან, არამედ შორეულ აღმოსავლეთთან, სამხრეთ-დასავლეთ აზიასთან და ჩინეთთან. ამავდროულად, ჩვენ კარგად ვიცით, რამდენად შეზღუდულია არსებული სატრანსპორტო მარშრუტები და მათი შესაძლებლობები. ამ მხრივ შუა დერეფანი ასევე საინტერესო პერსპექტივაა გერმანიის ეკონომიკისთვის. რამდენადაც სამხრეთ კავკასია უფრო პოლიტიკურად სტაბილურად განვითარდება, როგორც ეს ბოლო დროს მოხდა, ეს პერსპექტივა კიდევ უფრო მიმზიდველი გახდება“, – აღნიშნა ფრანკ-ვალტერ შტაინმაიერმა.