სომხეთთან სამშვიდობო შეთანხმების ტექსტი სრულად შეთანხმებულია, რომელიც 17 პუნქტისგან შედგება და აზერბაიჯანი აქ დამატებით პირობებს არ აყენებს, – ამის შესახებ აზერბაიჯანის პრეზიდენტმა, ილჰამ ალიევმა, გერმანიის პრეზიდენტთან, ფრანკ-ვალტერ შტაინმაიერთან შეხვედრისას განაცხადა.
აზერბაიჯანის პრეზიდენტის თქმით, ამის შემდეგ პირველ რიგში ეუთო-ს მინსკის ჯგუფი უნდა დაიშალოს.
„მეორე საკითხი სომხეთის კონსტიტუციას ეხება. სომხეთის კონსტიტუცია შეიცავს მითითებას სომხეთის დამოუკიდებლობის აქტზე. ეს არის კონსტიტუციის განუყოფელი ნაწილი. და არის მუხლი აზერბაიჯანის კანონიერი, ისტორიული ტერიტორიის სომხეთთან მიერთების შესახებ, რაც ჩვენს მიმართ ღია ტერიტორიულ პრეტენზიად მიიჩნევა. ამიტომ, სომხეთის კონსტიტუციიდან ამ დებულების ამოღება ჩვენი ლეგიტიმური მოთხოვნაა. როგორც კი ეს ორი პირობა შესრულდება, სამშვიდობო ხელშეკრულების ხელმოწერას არანაირი დაბრკოლება არ ექნება. როგორც ამბობენ, ბურთი სომხეთის მოედანზეა. თუ სომხეთს ნამდვილად სურს სამშვიდობო ხელშეკრულების ხელმოწერა, მან უნდა მიიღოს აზერბაიჯანის ეს ორი ლეგიტიმური პირობა“, – განაცხადა ილჰამ ალიევმა.