GUARDIANGE – იმ ფონზე, როცა აშშ-ის პრეზიდენტი ჯოზეფ ბაიდენი „კოვიდ-19“-ის ტესტზე დადებითი პასუხის გამო თავის დელავერის სახლშია იზოლირებული, „დემოკრატების“ რიგები სულ უფრო ფართოვდება მაღალი რანგის წარმომადგენლებით, ვინც მოუწოდებენ მას გადახედოს თავის საარჩევნო კანდიდატურას. ყოფილმა პრეზიდენტმა ბარაკ ობამამ ბაიდენის გამო შეშფოთება გამოთქვა მოკავშირეებთან და ნენსი პელოსიმ პირადად უთხრა პრეზიდენტს, რომ „დემოკრატიულმა პარტიამ“ შეიძლება დაკარგოს კონგრესის ქვედა პალატის კონტროლის უნარი, თუ ის არ გამოეთიშება 2024 წლის საპრეზიდენტო არჩევნებს.
18 ივლისს, გვიან ღამით, მონტანას სენატორი ჯონ ტესტერი გახდა მეორე „დემოკრატი“ ამ პალატაში, ახლა თითქმის ორ ათეულ კონგრესმენს შორის, რომლებიც მოუწოდებენ მას, რომ დატოვოს საარჩევნო მარათონი. სენატორის აზრით, „ბაიდენმა არ უნდა მოითხოვოს ხელახალ არჩევნებში მონაწილეობა კიდევ ერთი ვადით“.
ჯო ბაიდენის კამპანია 18 ივლისს, ბარაკ ობამას მიერ საპრეზიდენტო არჩევნებთან დაკავშირებით გამოხატული შეშფოთების ფონზე კიდევ უფრო დიდი ზეწოლის ქვეშ მოექცა, მით უფრო, გამოკითხვების მიხედვით, დონალდ ტრამპი კიდევ უფრო წინ მიიწევს.
„დემოკრატიული პარტიის“ ყრილობა 19 აგვისტოს უნდა გაიმართოს და ამ დრომდე არსებობს შესაძლებლობა იმისა, რომ პარტიამ ახალი კანდიდატი დაასახელოს, ოღონდ მხოლოდ იმ შემთხვევაში, თუკი თავად ბაიდენი იტყვის უარს ხელმეორედ კენჭისყრაზე.
„კოვიდ-19“-ზე დადებითი პასუხის შემდეგ აშშ-ის პრეზიდენტი ჯოზეფ ბაიდენი 17 ივლისს საღამოს ლას ვეგასიდან მშობლიურ დელავერში დაბრუნდა და ახლა ის თავისი ხანგრძლივი პოლიტიკური ცხოვრების ერთ-ერთი ყველაზე მნიშვნელოვანი გადაწყვეტილების წინაშე დგას – გაითვალისწინოს თუ არა მისი თანამოაზრე „დემოკრატების“ მზარდი მოწოდებები, უარი თქვას არჩევნებში ხელმეორედ კენჭისყრაზე.
მიუხედავად იმისა, რომ ატლანტაში პრეზიდენტ ბაიდენის დონალდ ტრამპთან საგანგაშო ტელედებატების შემდეგ „დემოკრატიული პარტიის“ შიგნით რისხვა და პანიკა თითქმის სამი კვირის განმავლობაში მუდმივად იზრდებოდა, თეთრი სახლი და ბაიდენის კამპანია ახალ ადგილას არიან, – განუცხადეს CNN-ს „დემოკრატების“ ოფიციალურმა პირებმა.
„პირადი საუბრები გრძელდება“ – უთხრა CNN-ს „დემოკრატების“ უფროსმა მრჩეველმა, რომელმაც ტელეკომპანიასთან ანონიმურობის პირობით ისაუბრა, რათა თავიდან აიცილოს კამპანიისა და თეთრი სახლის გაუცხოება. „ის არის მიმღები. არა ისეთი თავდამსხმელი, როგორც საჯაროდ ჩანს“.
„ის ამბობდა: „კამალა ვერ გაიმარჯვებს“, „როგორ ფიქრობთ, შეუძლია კამალას გამარჯვება?“ – თქვა მრჩეველმა. „ჯერ კიდევ გაურკვეველია, სადამდე შეიძლება დავიდეს, მაგრამ, როგორც ჩანს, უსმენს“.
ბაიდენის კამპანიამ, რომელიც ასევე განიცდის „დემოკრატიული პარტიის“ დონორების მზარდ პროტესტს, უარყო, რომ პრეზიდენტი თავის კანდიდატურის მოხსნას განიხილავს.
„თუ ფაქტებს მნიშვნელობა აქვს, და ეს ასეც უნდა იყოს, მოცემულობა ის გახლავთ, რომ პრეზიდენტი ბაიდენი „დემოკრატიული პარტიის“ კანდიდატია და ის ნოემბრის არჩევნებში გაიმარჯვებს:, – განუცხადა CNN-ს ბაიდენის პრესსპიკერმა, კევინ მუნოზმა.
ბაიდენის კამპანიისთვის მოვლენები გადამწყვეტ ფაზაში შედის. ABC News-ის ჯონათან კარლის ცნობით, სენატის უმრავლესობის ლიდერმა ჩაკ შუმერმა 13 ივლისს ბაიდენს უთხრა, რომ უკეთესი იქნებოდა, თუკი იგი საპრეზიდენტო მარათონს გამოეთიშებოდა.
განცხადებაში, რომელიც ABC News-ის რეპორტაჟს ეხმაურება, შუმერის პრესსპიკერმა თქვა: „თუ ABC-ის წყარო არ არის სენატორი ჩაკ შუმერი ან პრეზიდენტი ჯო ბაიდენი, რეპორტაჟი წმინდაწყლის სპეკულაციაა. შუმერმა პარტიის მოსაზრებები პირდაპირ გადასცა პრეზიდენტ ბაიდენს შაბათს“. თუმცა, ამ განცხადებაში არ იყო ნათქვამი სამი მნიშვნელოვანი სიტყვა „მე ჯოსთან ვარ“ – რომელსაც შუმერი ყოველ ჯერზე იმეორებდა, როდესაც მას ეკითხებოდნენ, უნდა გაეგრძელებინა თუ არა ბაიდენს არჩევნებში მონაწილეობა.
შუმერსა და ბაიდენს შორის პირადი შეხვედრა, რომელიც შაბათს, 13 ივლისს პრეზიდენტის დელავერის სანაპირო სახლში გაიმართა, „დემოკრატების“ მიერ განიხილება, როგორც ერთ-ერთი ყველაზე მნიშვნელოვანი მომენტი ამ ესკალაციის დრამაში.
თავად ბაიდენი დაჟინებით ირწმუნება, რომ ის უფრო კარგ ფორმაშია, ვიდრე მისი მოწინააღმდეგე დონალდ ტრამპი. ამის შესახებ მან ტელეკომპანია BET-თან საუბრისას განაცხადა.
ბაიდენის თქმით, მიუხედავად იმისა, რომ მის ასაკსა და ფიზიკურ მდგომარეობაზე კითხვები ლეგიტიმურია, მაინც უკეთეს ფორმაშია, ვიდრე ტრამპი.
„მე მესმის, რატომ საუბრობს ხალხი. სამი წლით დიდი ვარ ტრამპზე და ვფიქრობ, რომ უკეთეს ფიზიკურ ფორმაში ვარ, ვიდრე ის. მაგრამ არ არის უსაფუძვლო, ხალხმა თქვას, რომ 81 წლის ვარ“, – თქვა ბაიდენმა.
მომზადებულია GUARDIANGE-ის მიერ