რუსეთმა უკრაინის ყირიმზე თავდასხმის გამო აშშ-ის ელჩი გამოიძახა, რადგან მოსკოვის მტკიცებით, კიევმა აშშ-ში დამზადებული რაკეტები გამოიყენა

GUARDIANGE – რუსეთის საგარეო საქმეთა სამინისტრომ აშშ-ის ელჩი გამოიძახა იმის საპროტესტო ნიშნად, რომ მოსკოვის შეფასებით, უკრაინამ აშშ-ში დამზადებული მოწინავე რაკეტები გამოიყენა რუსეთის მიერ ანექსირებულ ყირიმზე თავდასხმაში, რომლის შედეგადაც 4 ადამიანი დაიღუპა და 150-ზე მეტი დაიჭრა.

ვაშინგტონი „ფაქტობრივად ომის მონაწილე გახდა“ უკრაინის მხარეს და ამას „საპასუხო ზომები აუცილებლად მოჰყვება“, – ნათქვამია სამინისტროს განცხადებაში, თუმცა არ არის დაზუსტებული, რა იქნება საპასუხო ზომები.

კიევის ძალები უკრაინაში რუსეთის შეჭრის შემდეგ დიდწილად დასავლეთის მიერ მიწოდებულ შეიარაღებას ეყრდნობოდნენ. სამხედრო დახმარება უმნიშვნელოვანესია იმისათვის, რომ უკრაინამ შეძლოს კრემლის არმიის შეკავება. რამდენიმე თვეა, აღმოსავლეთ და სამხრეთ უკრაინაში 1 000-კილომეტრიანი ფრონტის ხაზის გასწვრივ მცირე, მაგრამ მნიშვნელოვანი ცვლილებებია.

ზოგიერთი დასავლური ქვეყანა ყოყმანობდა კიევის არმიისთვის უფრო და უფრო მეტი დახვეწილი შეიარაღების გადაცემაზე, რადგანაც შიშობდა, რომ ეს პოტენციურად პროვოცირებას გამოიწვევდა კრემლში. მაგრამ იმის გამო, რომ უკრაინა რუსეთის უფრო დიდი და უკეთ აღჭურვილი სამხედრო ძალების წინააღმდეგ მედგრად იბრძოდა, დასავლელი ლიდერები თანდათან დანებდნენ და მეტი მხარდაჭერა გაუწიეს კიევს.

პენტაგონმა გასულ კვირას განაცხადა, რომ უკრაინის სამხედროებს მიეცემოდათ უფლება, გამოეყენებინათ აშშ-ის მიერ მიწოდებული გრძელი რადიუსის რაკეტები რუსეთის ტერიტორიაზე არსებულ სამიზნეებზე დასარტყმელად, თუკი ისინი თავდაცვის მიზნით იმოქმედებდნენ. ომის დაწყების დღიდან, აშშ არ აძლევდა საშუალებას უკრაინას, გამოეყენებინა მის მიერ მოწოდებული იარაღი რუსეთის ტერიტორიაზე სამიზნეებზე თავდასხმის მიზნით, იმის შიშით, რომ კონფლიქტი კიდევ უფრო არ გამწვავებულიყო.

ყირიმი, რომლის ანექსიაც რუსეთმა 2014 წელს მოახდინა, რაც მსოფლიოს უმეტესმა ნაწილმა უკანონოდ ცნო, დიდი ხანია, მისი დასავლელი მოკავშირეების მიერ უკრაინის სამართლიან სამიზნედ გამოცხადდა.

რუსეთის ხელისუფლებამ განაცხადა, რომ 23 ივნისს თავდასხმის შედეგად დაღუპულთა შორისაა ორი ბავშვი, რომლებიც ყირიმის საპორტო ქალაქ სევასტოპოლის სანაპირო ზოლზე ჩამოგდებული უკრაინული რაკეტების ნამსხვრევებს ემსხვერპლნენ. მოსკოვის მტკიცებით, გამოყენებულია კასეტური საბრძოლო მასალები, რომლებიც კრიტიკოსების თქმით, უფრო მეტ მშვიდობიან მოსახლეობას აზიანებს, ვიდრე მებრძოლებს.

რუსეთმა განაცხადა, რომ რაკეტები იყო აშშ-ს წარმოების ATACMS-ები, შორ მანძილზე მართვადი რაკეტები. მოსკოვმა აშშ-ის ელჩი ლინ ტრეისი საგარეო საქმეთა სამინისტროში დაიბარა.

რუსეთის საგარეო საქმეთა სამინისტროს განცხადებაში ნათქვამია, რომ ამ ტიპის სარაკეტო დარტყმების მიზნობრიობა და „მისიის განხორციელება“ აშშ-ის სამხედრო ექსპერტების მიერ იმართება და რომ შეერთებულ შტატებს უკრაინის ხელისუფლებასთან ერთად „თანაბარი პასუხისმგებლობა ეკისრება ამ თავდასხმაზე“ და „რუსეთის ტერიტორიის სიღრმეში დარტყმების დაშვება პასუხგაუცემელი არ დარჩება“.

ამასობაში, რუსეთის თავდაცვის სამინისტრომ 24 ივნისს გაავრცელა ინფორმაცია უკრაინის სამხედროების „მთავარ ლოგისტიკურ ცენტრზე“ დარტყმის შესახებ, სადაც დასავლეთის მიერ მიწოდებული რაკეტები და სხვა იარაღი ინახებოდა.

რუსეთის თავდაცვის სამინისტროს ცნობით, დარტყმა სამხედრო თვითმფრინავებით, დრონებით, სახმელეთო რაკეტებით და არტილერიით განხორციელდა. სამინისტროს არ დაუსახელებია ადგილმდებარეობა, თუ საიდან მოხდა ეს დარტყმები.