კომუნიკაციების კომისიამ ცაგერისა და ლენტეხის მუნიციპალიტეტებში „ციფრული მხარდაჭერის პროგრამის“ განხორციელება დაიწყო, რომლის ფარგლებშიც, სამიზნე მუნიციპალიტეტების მერის მოადგილეებთან, ადმინისტრაციის თანამშრომლებთან, მერის წარმომადგენლებთან, მოსახლეობასთან და დაინტერესებულ მხარეებთან საინფორმაციო შეხვედრები გამართა.
პროგრამის ფარგლებში, ცაგერისა და ლენტეხის მუნიციპალიტეტების 25 სამიზნე დასახლებაში ციფრული წიგნიერებისა და ინტერნეტის უსაფრთხოდ გამოყენების შესახებ ჩატარდება სემინარები, რომელთა ფარგლებშიც, ადგილობრივები სპეციალისტების დახმარებით ინფორმაციის მოძიების, ელ-ფოსტის გამოყენების, გუგლის რუკითა და თარჯიმნით სარგებლობის, ასევე, ადგილმდებარეობის გაზიარების და ონლაინ საკომუნიკაციო საშუალებების გამოყენების შესახებ მიიღებენ ინფორმაციას.
„ციფრული მხარდაჭერის პროგრამა“ 2022 წლიდან ხორციელდება. პროგრამა წარმატებით დასრულდა ოზურგეთის, ხელვაჩაურის, ქობულეთის, ჩოხატაურის, სამტრედიის, ამბროლაურის, ონისა და აბაშის მუნიციპალიტეტში. ამჟამად სემინარები აქტიურად მიმდინარეობს ზუგდიდის მუნიციპალიტეტის სამიზნე სოფლებში. დღეის მონაცემით, ციფრული წიგნიერების, ინტერნეტის უსაფრთხოდ გამოყენებისა და სახელმწიფო ელექტრონული სერვისებით სარგებლობის საკითხებში სულ 151 სოფლის 4200-ზე მეტი ბენეფიციარი გადამზადდა.
ცაგერის მუნიციპალიტეტის მერიაში შეხვედრას ესწრებოდნენ მუნიციპალიტეტის მერის მოადგილე რევაზ ახვლედიანი და მერის წარმომადგენლები ტერიტორიულ ერთეულებში.