GUARDIANGE – სამხრეთ კორეის სასამართლომ ყოფილ პრეზიდენტს, იუნ სუკ იოლს 30 წლით თავისუფლების აღკვეთა მიუსაჯა ჩრდილოეთ კორეაში დრონების გაგზავნისთვის.
პროკურორები ამტკიცებდნენ, რომ იუნმა ოპერაცია 2024 წლის ოქტომბერში ბრძანა, რათა ფხენიანის პროვოცირება მოეხდინა და საბაბი შეექმნა იმავე წლის ბოლოს მისი წარუმატებელი სამხედრო მდგომარეობის გამოცხადებისთვის.
როდესაც იუნმა 3 დეკემბერს საომარი მდგომარეობა გამოაცხადა, მან განაცხადა, რომ ქვეყანას იცავდა იმ „ანტისახელმწიფოებრივი“ ძალებისგან, რომლებიც ჩრდილოეთ კორეას სიმპათიით უჭერდნენ მხარს. თუმცა, მალევე გაირკვა, რომ მას შიდა პრობლემები ამოძრავებდა და მასობრივი საპროტესტო აქციების ფონზე მან სამხედრო მდგომარეობა გააუქმა.
იუნი იმპიჩმენტით გადააყენეს და ამჟამად ციხეში იხდის სასჯელს მას შემდეგ, რაც მას 2026 წლის თებერვალში სამუდამო პატიმრობა მიესაჯა აჯანყებისთვის, რომელიც სამხედრო მდგომარეობის შემოღების წარუმატებელი მცდელობის გამო მოხდა.
პარასკევს, სეულის რაიონულმა სასამართლომ იუნი, ასევე მისი ყოფილი თავდაცვის მინისტრი კიმ იონგ-ჰიონი, თავდაცვის კონტრდაზვერვის სარდლობის ყოფილი უფროსი იო ინ-ჰიუნგი და დრონების ოპერაციების სარდლობის ყოფილი უფროსი კიმ იონგ-დე ღალატსა და ძალაუფლების ბოროტად გამოყენებაში დამნაშავედ ცნო.
კიმს 30 წლით თავისუფლების აღკვეთა მიესაჯა, იოს – 15 წლით, ხოლო კიმ იონგ-დეს – სამი წლით თავისუფლების აღკვეთა ხუთწლიანი პირობითი მსჯავრით.
„ბრალდებულებმა სამხედრო ოპერაციის საბაბი გამოიყენეს ჩრდილოეთ კორეის მხრიდან პროვოკაციების მოსაწყობად, საგანგებო მდგომარეობის შექმნის მიზნით“, – განაცხადა სასამართლომ.
განცხადებაში ასევე დასძენენ, რომ სამივე ოფიციალურმა პირმა „ჩრდილოეთ კორეის პროვოცირება მოახდინა“, რითაც „გაზარდა სამხედრო კონფლიქტის რისკი“, თუმცა დაასკვნეს, რომ ამ მოვლენაში „უდიდესი პასუხისმგებლობა“ იუნს ეკისრება.
იუნის ადვოკატებმა განაცხადეს, რომ მისი ქმედებები წარმოადგენდა „ლეგიტიმურ“ პასუხს ჩრდილოეთ კორეის მიერ „ნაგვის ბუშტებით განხორციელებულ პროვოკაციებზე“.
ეს მინიშნება იყო ჩრდილოეთ კორეის მიერ 2024 წელს ასობით ბუშტის სამხრეთის საზღვრის გადაღმა გაშვებაზე, რომლებშიც, როგორც მოგვიანებით აღმოჩნდა, „ჭუჭყიანი ნარჩენები და ნაგავი“ იყო თავმოყრილი.
კორეის ომის შემდეგ ორივე ქვეყანა თავის კამპანიებში ასეთ „პროპაგანდისტულ ბუშტებს“ იყენებს, სადაც შეტყობინებებია მოთავსებული.
თუმცა, დაძაბულობა 2024 წელს გამწვავდა, როდესაც ჩრდილოეთ კორეამ სამხრეთი მის დედაქალაქში დრონების გაშვებაში დაადანაშაულა. სავარაუდოდ, ამ დრონებმა მთელ ფხენიანში პროპაგანდისტული ბროშურები მიმოფანტეს, რასაც ჩრდილოეთმა ომის შესაძლო გამოწვევეის პროვოკაცია უწოდა.
მოსამართლემ პარასკევს განაჩენის გამოტანისას განაცხადა, რომ სწორედ იუნმა გაგზავნა ეს დრონები ჩრდილოეთში იმ იმედით, რომ ისინი საპასუხო დარტყმას განახორციელებდნენ.
აჯანყების გარდა, იუნს ასევე მიესაჯა ხუთი წლით თავისუფლების აღკვეთა უფლებამოსილების ბოროტად გამოყენებისა და მისი დაპატიმრების ხელის შეშლისთვის.
იუნის სამხედრო მდგომარეობის შემოღების მცდელობამ და შემდგომმა საპროტესტო აქციებმა ქვეყანაში თვეების განმავლობაში ქაოსი გამოიწვია, რაც არჩევნებით დასრულდა, რომელშიც ოპოზიციური დემოკრატიული პარტიის კანდიდატმა ლი ჯე მიონგმა გადამწყვეტი მანდატი მოიპოვა.