ევროპა მტკიცედ დგას სომხეთის გვერდით. ჩვენ ვამზადებთ ევროკავშირის დახმარების პაკეტს. ეს მოიცავს 50 მილიონ ევროზე მეტი ღირებულების დაუყოვნებლივ ფინანსურ დახმარებას. და კიდევ უფრო მეტი იქნება, – ამის შესახებ ევროკომისიის პრეზიდენტის ურსულა ფონ დერ ლაიენის განაცხადებაშია აღნიშნული.
მისი თქმით, ცოტა ხნის წინ სომხეთის პრემიერ-მინისტრ ნიკოლ ფაშინიანთან სატელეფონო საუბარი გამართა, რა დროსაც საუბარი შეეხო რუსეთის მიერ სომხეთის წინააღმდეგ ბოლო დროს დაწესებულ შეზღუდვებს.
ევროკომისიის პრეზიდენტმა ასევე აღნიშნა, რომ მოსკოვი ერევანზე ეკონომიკურ ზეწოლას ახორციელებს.
„ვესაუბრე პრემიერ-მინისტრ ნიკოლ ფაშინიანს რუსეთის მიერ სომხეთის წინააღმდეგ ბოლო დროს დაწესებულ შეზღუდვებზე. ეს არის ეკონომიკური იძულება, რაც მიუღებელია. სომხური პროდუქციის ექსპორტზე შეზღუდვების გავრცელებით, მოსკოვი ეკონომიკურ ურთიერთობებს პოლიტიკური ზეწოლის იარაღად იყენებს. ჩვენ ეს სცენარი ზედმეტად კარგად ვიცით. სწორედ ამიტომ ევროპა მტკიცედ დგას სომხეთის გვერდით. ჩვენ ვამზადებთ ევროკავშირის დახმარების პაკეტს. ეს მოიცავს 50 მილიონ ევროზე მეტი ღირებულების დაუყოვნებლივ ფინანსურ დახმარებას. და კიდევ უფრო მეტი იქნება. ისინი მოიცავს ზოგიერთი სომხური პროდუქტით, კერძოდ, სოფლის მეურნეობის პროდუქტებით ვაჭრობის გამარტივების ზომებს, დაზარალებული სექტორების, როგორიცაა ყვავილები, პრაქტიკულ მხარდაჭერას იმის გათვალისწინებით, რომ რუსეთმა ცოტა ხნის წინ შეზღუდა სომხეთიდან ყვავილების იმპორტი საეჭვო ბრალდებების გამო.
ხვალ ლატვიაში 10 000 ყვავილის ჩატანა იგეგმება. ჩვენ ასევე გავაგრძელებთ ჩვენი ბიზნესების დაკავშირებას, ერევანში ჩვენს ბოლო სამიტზე აღებული ვალდებულებების შესრულების მიზნით. 2024 წლიდან ევროკავშირის მხარდაჭერა „მდგრადობისა და ზრდის გეგმის“ ფარგლებში უკვე დაეხმარა 7 000 ბიზნესს და ხელი შეუწყო 20 000-ზე მეტი სამუშაო ადგილის შექმნას. სომხეთი არის ადგილი, სადაც ნიჭი, ინოვაცია და შესაძლებლობები ერთიანდება. ევროპული ბიზნესებისთვის ეს მნიშვნელოვანი ადგილია“, – აცხადებს ურსულა ფონ დერ ლაიენი.
ამასთან, ურსულა ფონ დერ ლაიენმა სამხრეთ კავკასიის რეგიონის მნიშვნელობაზეც ისაუბრა და აღნიშნა, რომ რეგიონში სავაჭრო გზების გახსნა, მათ შორის საქართველოს ჩართულობით, მნიშვნელოვანი წინ გადადგმული ნაბიჯია.
მისივე თქმით, ერევანს აქვს პოტენციალი, ევროპის, სამხრეთ კავკასიისა და ცენტრალური აზიის დამაკავშირებელი ცენტრი გახდეს.
„ბოლო დროს თურქეთთან სავაჭრო გზების ხელახლა გახსნა, მათ შორის საქართველოსა და თურქეთის გავლით სარკინიგზო კავშირი, შესანიშნავი წინ გადადგმული ნაბიჯია. სომხეთს აქვს პოტენციალი, გახდეს ევროპის, სამხრეთ კავკასიისა და ცენტრალური აზიის დამაკავშირებელი სტრატეგიული ცენტრი. ჩვენ მზად ვართ, მხარი დავუჭიროთ ინფრასტრუქტურას და სასაზღვრო გამშვებ პუნქტებს, როდესაც რეგიონული კავშირები ხელახლა გაიხსნება. ჩვენ გავაგრძელებთ ამ პრიორიტეტების წინ წაწევას 23 ივნისს „დაკავშირების პლატფორმის“ მინისტერიალზე. ეფექტური კოორდინაციის უზრუნველსაყოფად, შევთანხმდით, რომ შევქმნათ ერთობლივი ევროკავშირი-სომხეთის სამუშაო ჯგუფი. ეს გააკონტროლებს ყველა ამ ინიციატივის განხორციელებას და მომავალში ნებისმიერ შემდგომ ზომას“, – აცხადებს ურსულა ფონ დერ ლაიენი.