ტრამპის გინებით სავსე მუქარის შემდეგ ირანი „გამანადგურებელი“ შურისძიებით იმუქრება

GUARDIANGE – ირანი „გაცილებით უფრო დამანგრეველი“ შურისძიებით იმუქრება, თუ მშვიდობიან მოსახლეობას თავს დაესხმებიან.

„თუ სამოქალაქო სამიზნეებზე თავდასხმები განმეორდება, ჩვენი შეტევითი და საპასუხო ოპერაციების შემდეგი ეტაპები გაცილებით დამანგრეველი და ფართომასშტაბიანი იქნება“, – ნათქვამია ირანის უმაღლესი ოპერატიული სამხედრო სარდლობის, ხათამ ალ-ანბიას ცენტრალური შტაბის წარმომადგენლის განცხადებაში, რომელიც ირანის ისლამური რესპუბლიკის მაუწყებლობამ (IRIB) გამოაქვეყნა.

ეს მას შემდეგ მოხდა, რაც აშშ-ის პრეზიდენტი დონალდ ტრამპი ირანის ელექტროსადგურებსა და ხიდებზე თავდასხმებით დაიმუქრა, თუ ირანი ჰორმუზის სრუტის ხელახლა გახსნის თაობაზე 7 აპრილამდე მიცემულ ვადას არ შეასრულებს.

თავდაპირველად, ეს ვადის ორშაბათისთვის, 6 აპრილისთვის იყო დანიშნული, თუმცა Truth Social-ზე ირანის მიმართ თავისი ბოლო მუქარის გამოქვეყნებიდან რამდენიმე საათში, რომელშიც „სამშაბათს“ მოიხსენიებდა, ტრამპმა კვლავ დაწერა „სამშაბათი, აღმოსავლეთის დროით საღამოს 8:00 საათი!“ (8 აპრილის BST-ის 01:00 საათი).

ტრამპის ბოლო მუქარის შემდეგ ნავთობის ფასმა 110 დოლარს მიაღწია

BBC-ის ცნობით, ნავთობის ფასმა ბარელზე 110 აშშ დოლარს მიაღწია მას შემდეგ, რაც პრეზიდენტმა დონალდ ტრამპმა სოციალურ ქსელში ირანის წინააღმდეგ გინების შემცველი მუქარის განცხადება გაავრცელა.

ბრენტის მარკის ნავთობის ფასი თავდაპირველად 1.6%-ით გაიზარდა და 110.85 დოლარს მიაღწია, თუმცა აზიაში დილის ვაჭრობის დროს ოდნავ შემცირდა.

აშშ-ში სავაჭრო ნავთობის ფასი ოდნავ, 0.3%-ით გაიზარდა და 111.80 აშშ დოლარს მიაღწია.

თავდაპირველი ნახტომი მას შემდეგ მოხდა, რაც ტრამპმა თეირანზე კიდევ უფრო მეტი ზეწოლა მოახდინა და ირანის ხიდებსა და ელექტროსადგურებზე დარტყმით დაემუქრა, თუ ირანი უკან არ დაიხევდა თავისი მუქარისგან იმ გემების მიმართ, რომლებიც ჰორმუზის კრიტიკულად მნიშვნელოვანი სავაჭრო სრუტის გადაკვეთას შეეცდებიან.

აზიის ძირითადი საფონდო ბირჟებიც გაიზარდა. იაპონიის Nikkei 225 ბირჟაზე 1.6%-ით, ხოლო სამხრეთ კორეის Kospi-ის ინდექსი 0.9%-ით გაიზარდა.

ახლო აღმოსავლეთში თავდასხმები გრძელდება

ამასობაში, თავდასხმები გრძელდება ახლო აღმოსავლეთში. ლიბანის ჯანდაცვის სამინისტროს ცნობით, ლიბანზე ისრაელის მიერ განხორციელებული დარტყმების შედეგად სულ მცირე 15 ადამიანი დაიღუპა და 39 დაიჭრა,  დაღუპულთა შორის ოთხი წლის გოგონაა.

ბეირუთზე თავდასხმის შედეგად სულ მცირე ხუთი ადამიანი დაიღუპა, ხოლო სამი – ბეირუთის აღმოსავლეთით, აინ საადეში, საცხოვრებელ კორპუსზე თავდასხმის შედეგად, განაცხადეს ოფიციალურმა პირებმა.

ისრაელის მედიის ცნობით, ისრაელში საცხოვრებელ კორპუსში, რომელსაც რაკეტა მოხვდა, ორი ცხედარი იპოვეს.

ისრაელის სამხედრო ძალებმა განაცხადეს, რომ ირანის დედაქალაქ თეირანში მდებარე სამიზნეებზე საჰაერო დარტყმების ტალღა განახორციელეს.

როგორც BBC იუწყება, აბუ-დაბიზე ირანმა მორიგი თავდასხმა განახორციელა, თუმცა საჰაერო თავდაცვის სისტემებმა „წარმატებული ჩაჭრა“ განახორციელეს.

5 აპრილს, არაბთა გაერთიანებული საამიროების თავდაცვის სამინისტრომ განაცხადა, რომ ირანიდან წამოსული 50 დრონი, ერთი ფრთოსანი რაკეტა და ცხრა ბალისტიკური რაკეტა ჩამოაგდეს.

ომის დაწყებიდან ირანის მიერ არაბთა გაერთიანებული საამიროების მიმართულებით სულ 2,191 დრონი, 24 ფრთოსანი რაკეტა და 507 ბალისტიკური რაკეტა იქნა გამოყენებული.

ირანის უნივერსიტეტზე დარტყმამ თეირანში გაზის გათიშვა გამოიწვია

შარიფის ტექნოლოგიურ უნივერსიტეტზე დარტყმამ თეირანის ზოგიერთ ნაწილში გაზის მიწოდების შეფერხება გამოიწვია.

BBC Persian-ის ცნობით, უნივერსიტეტის ზოგიერთი შენობა, მათ შორის ტექნოლოგიური ცენტრის შენობა და სკოლის მეჩეთი, როგორც ჩანს, დაზიანებულია. დღეს დილით ინტერნეტში გავრცელებულ ფოტოებზე ჩანს, როგორ ამოდის სქელი კვამლი ირანის დედაქალაქის რაიონებიდან.

დედაქალაქის სხვა რაიონში, საცხოვრებელ შენობაზე საჰაერო დარტყმის შედეგად 13 ადამიანი დაიღუპა.

ომის დაწყების შემდეგ ირანში არაერთი უნივერსიტეტი დაზარალდა, მათ შორის თეირანის მეცნიერებისა და ტექნოლოგიების უნივერსიტეტი და შაჰიდ ბეჰეშტის უნივერსიტეტი.

ტრამპი პრესკონფერენციას გამართავს მფრინავის გადარჩენასთან დაკავშირებით

აშშ-ის პრეზიდენტმა დონალდ ტრამპმა თავის Truth Social პლატფორმაზე განცხადება გამოაქვეყნა ირანში ჩამოგდებული „F-15“-დან მეორე ამერიკელი მფრინავის დრამატული გადარჩენის შესახებ.

მისი თქმით, ის სამხედროებთან ერთად პრესკონფერენციას ორშაბათს, აღმოსავლეთის დროით 13:00 საათზე (17:00 BST) გამართავს.

ტრამპმა თავის განცხადებაში ირანის მთების სიღრმეში ჩატარებული რეიდის გაბედული ხასიათის შესახებ აღნიშნა.

ამერიკელი ოფიცერი ირანის მიერ აშშ-ის გამანადგურებლის ჩამოგდებიდან თითქმის ორი დღის შემდეგ გადაარჩინეს. ის მთებში იმალებოდა შუქურის სიგნალითა და პისტოლეტით თავის დასაცავად. სანამ ირანელები ტერიტორიაზე სამძებრო სამუშაოებს აწარმოებდნენ და მას მიაკვლევდნენ, საბრძოლო თვითმფრინავის პილოტი აშშ-ის ეკიპაჟებმა „მტრული ტერიტორიის სიღრმეში ჩატარებული ოპერაციის დროს“ გადაარჩინეს.

თეთრი სახლის პრესმდივანმა ტრამპის განცხადებიდან მალევე თქვა, რომ „საზოგადოების მოთხოვნის გამო“ პრესკონფერენცია ბრიფინგების დარბაზში გაიმართება და არა უფრო პატარა ოვალურ ოფისში, სადაც ის დაგეგმილი იყო.