ჟირონდის რეგიონში, რომელიც ბორდოსაც მოიცავს, ხანძარმა 42 000 ჰექტარზე მეტი ტერიტორია გაანადგურა. „[ეს] ცოტა პომპეის მაგონებს “, – თქვა ბორდოს ერთ-ერთმა მცხოვრებმა. „სუნთქვა საკმაოდ რთული იყო“.
ბოლო დღეების განმავლობაში საფრანგეთსა და ესპანეთში 300 000-ზე მეტი ადამიანი იქნა ევაკუირებული.
ჟირონდში ხანძარს 2 000-ზე მეტი მეხანძრე ებრძვის
ჟირონდში ტყის ხანძრების წინააღმდეგ ბრძოლის ხელმძღვანელი რემი ლასურელი ამბობს, რომ ბოლო ხუთი ან ექვსი დღის განმავლობაში დაახლოებით 42 000 ჰექტარი ფართობი დაიწვა, თუმცა ეს რიცხვი ერთ ღამეში მნიშვნელოვნად არ გაზრდილა.
მისი თქმით, ამ დროისთვის დაახლოებით 240 სახლი და საცხოვრებელი კომპლექსია განადგურებული.
ლასურელი დასძენს, რომ ხანძარს 2000-ზე მეტი მეხანძრე ებრძვის და მას სხვა ევროპული ქვეყნებიდან საჰაერო მხარდაჭერაც აქვს.
მისი თქმით, მეხანძრეებმა ხანძრის კიდეებთან დიდი ხანძარსაწინააღმდეგო ზოლები გააკეთეს, რათა ბორდოზე მისი გავრცელება შეეჩერებინათ.
საფრანგეთში ტყის ხანძარს 4 მეხანძრე ემსხვერპლა.
ბორდო? ის პომპეის ჰგავს, ამბობს ადგილობრივი
„[ეს] ცოტა პომპეის მაგონებს, განსაკუთრებით შაბათ-კვირას, ჰაერი საკმაოდ კვამლიანი იყო, სუნთქვა საკმაოდ რთული. ნამწვის სუნი თითქმის მთელ ქალაქში იდგა“, – ამბობს ბორდოს მკვიდრი კრის დე აბრეა.
მისი თქმით, მიუხედავად იმისა, რომ ქალაქში ბევრი „უბრალოდ აგრძელებს“ ცხოვრებას, ზოგი სხვაგან, ნათესავებთან დარჩენაზე ფიქრობს.
მისი თქმით, ხალხისთვის მთავარი საფიქრალია: „სად წავიდე აქედან, თუ ოჯახი არ მეყოლება?“ და შემდეგ, „ისევ ვნახავ ჩემს სახლს?“
ის ამბობს, რომ „არასდროს“ უფიქრია, რომ საქმე ბორდოსთან ახლოს ახლანდელ სიტუაციამდე მივიდოდა და ამას „თითქმის სიურეალისტურს“ უწოდებს.
„უბრალოდ საშინელებაა იმის გაცნობიერება, რომ ხანძარი შეიძლება ასე ახლოს მოვიდეს.“
საფრანგეთის მცხოვრებლები ხანძრის შედეგად დაზარალებულებს სახლების კარებს უღებენ
საფრანგეთის ჟირონდის კომუნაში მცხოვრებლებმა „სპონტანური სოლიდარობის“ განცდა დანერგეს, რათა დაეხმარონ ხანძრის შედეგად დაზარალებულებს, განაცხადა ქალაქის საბჭოს წევრმა.
ბაზასში მცხოვრები ჯულიენ ბოინეტი Radio 4-ის „დღევანდელ“ პროგრამაში აცხადებს, რომ მიმდინარე ხანძრების გამო, ამ ტერიტორიაზე ამჟამად ბევრი „ლტოლვილია, უკეთესი სიტყვის არარსებობის გამო“.
მისი თქმით, ქალაქი ჩვილებისთვის საჭირო ნივთების, როგორიცაა საბნები და საფენები, შეგროვებას ახორციელებს.
„ხალხი [თავიანთი] სახლების კარებსაც ხსნიან, რათა დარწმუნდნენ, რომ მათ შეუძლიათ დარჩენა, რადგან სამხედრო საწოლზე ამდენი დღის განმავლობაში ყოფნა სახალისო არ არის“, – ამბობს ბოინეტი.
მაკრონი აცხადებს, რომ საფრანგეთში ხანძრები „მეორე მსოფლიო ომის შემდეგ ყველაზე მძიმეა“
საფრანგეთის პრეზიდენტმა ემანუელ მაკრონმა ბორდოს მახლობლად მძვინვარე ხანძარს მეორე მსოფლიო ომის შემდეგ ყველაზე მასშტაბური უწოდა.
„უნდა გვესმოდეს, რომ სრულიად უპრეცედენტო ხანძრის წინაშე ვდგავართ. სიტუაცია, რომელსაც ჩვენ ვუმკლავდებით, ყველაზე მძიმეა, რაც კი ოდესმე დაფიქსირებულა“, – განაცხადა მაკრონმა 27 ივლისს, ჟირონდის რეგიონში ვიზიტის დროს.
ჟურნალისტებთან ცალკე საუბრისას მაკრონმა ასევე თქვა, რომ ლანდის რეგიონში ხანძარი ლოკალიზებულია და კონტროლის ქვეშაა მოქცეული.
საინფორმაციო სააგენტო AFP-ის ცნობით, მაკრონმა აღნიშნა, რომ ხანძრის ჩასაქრობად ყველა არსებული რესურსი მობილიზებულია და პროცესში 1500-ზე მეტი სამხედრო მოსამსახურეა ჩართული.
საფრანგეთის პრეზიდენტმა დასძინა, რომ ხანძრის წინსვლის შესაჩერებლად გათხრილი და გამაგრებულია ხანძარსაწინააღმდეგო ზოლები.
ესპანეთში ტემპერატურის მატება ხანძრის ჩაქრობას „სულ უფრო და უფრო ართულებს“
ესპანეთის ეროვნული მეტეოროლოგიური სამსახურის ცნობით, ქვეყანაში ძლიერი სიცხისა და სიმშრალის გამო ხანძარი „უკიდურეს“ საფრთხეს წარმოადგენს.
შინაგან საქმეთა მინისტრმა ფერნანდო გრანდე-მარლასკამ 27 ივლისს განაცხადა, რომ ორშაბათი და სამშაბათი „აბსოლუტურად გადამწყვეტი დღეები“ იყო ქვეყანაში ხანძრების კონტროლისთვის.
27 ივლისს, შინაგან საქმეთა სამინისტრომ განაცხადა, რომ მადრიდის, ავილასა და ტოლედოს რეგიონებიდან 60 000-ზე მეტი ადამიანი იქნა ევაკუირებული.
მეტეოროლოგიური სამსახურის ცნობით, მაღალი ტემპერატურა, სულ მცირე, კვირამდე გაგრძელდება.
ტყის ტექნიკური ინჟინრების ოფიციალური ასოციაციის ტექნიკური დირექტორი, მარია ევგენია ოლივე, ამბობს, რომ მაღალი ტემპერატურის გამო ხანძრის ჩაქრობის ძალისხმევა „სულ უფრო და უფრო რთულდება“.