საქართველოს საგარეო საქმეთა მინისტრი მაკა ბოჭორიშვილი ქალაქ სამარყანდში, იუნესკო-ს გენერალური კონფერენციის 43-ე სესიაში მიიღებს მონაწილეობას.
ვიზიტის ფარგლებში საგარეო საქმეთა მინისტრი სიტყვით გამოვა 43-ე სესიაზე, ასევე შეხვედრებს გამართავს კოლეგა მინისტრებსა და იუნესკო-ს ხელმძღვანელ პირებთან.
იუნესკო-ს გენერალური კონფერენციის ფარგლებში მოეწყობა ქართული პავილიონი. ექსპოზიცია მიეძღვნება ქართულ არამატერიალურ კულტურულ მემკვიდრეობას – ქვევრის ღვინის დამზადების ტრადიციას და ქართულ პოლიფონიურ მუსიკას.
სამარყანდის მუსიკალურ-დრამატული თეატრის სცენაზე გაიმართება ქართული ხალხური სიმღერის ანსამბლის, „ბასიანის“ კონცერტი. სამარყანდში დაგეგმილ ღონისძიებებს საგარეო საქმეთა სამინისტრო კულტურის სამინისტროსა და ღვინის ეროვნულ სააგენტოსთან თანამშრომლობით გამართავს.
ინფორმაციას საგარეო საქმეთა სამინისტროს პრესსამსახური ავრცელებს.