GUARDIANGE – იაპონიის აღმოსავლეთ ნაწილში, დედაქალაქ ტოკიოს მახლობლად, ჩიბას პრეფექტურაში რეკორდული წვიმების შედეგად, სულ მცირე ექვსი ადამიანი დაიღუპა და ხუთი დაშავდა.
ხელისუფლებამ წვიმას „უპრეცედენტო“ უწოდა. 20 000-ზე მეტ ოჯახს ელექტროენერგიის მიწოდება შეუწყდა, ხოლო 7 000 მგზავრი ღამით ტოკიოს ნარიტას აეროპორტში დარჩა.
BBC-ის ცნობით, ადგილობრივმა ხელისუფლებამ 13 აგვისტოს საგანგებო სიტუაციის ყველაზე მაღალი, მეხუთე დონე გამოაცხადა. 14 აგვისტოს დილისთვის ეს დონე მეოთხემდე შემცირდა, თუმცა მოქალაქეებს კვლავ აფრთხილებენ მეწყერისა და წყალდიდობის საშიშროების შესახებ.
წყალდიდობა იაპონიასა და მეზობელ ქვეყნებში მიმდინარე კვირაში თავსდამტყდარი შტორმების სერიას მოჰყვა, რაც, პროგნოზის თანახმად, უჩვეულოდ აქტიური ტაიფუნების სეზონად იქცა.
იაპონიის მეტეოროლოგიური სააგენტოს ცნობით, ბოლო წყალდიდობა გამოწვეული იყო ქვეყნის აღმოსავლეთით შემომავალი თბილი, ნოტიო ჰაერით, რომელიც ცივ ჰაერთან შერწყმის შედეგად ატმოსფერულ პირობებს უკიდურესად არასტაბილურს ხდიდა.
წვიმები, სავარაუდოდ, 14 აგვისტოს დღის ბოლომდე გაგრძელდება.
„ეს შემთხვევა უკიდურესად უჩვეულო სიტუაცია იყო, იაპონიის ამინდის სტანდარტებითაც კი“, – განუცხადა ჩიბას გუბერნატორმა ტოშიჰიტო კუმაგაიმ დილით ჟურნალისტებს.
„წარსულში ბევრ კატასტროფაზე გვაქვს რეაგირება მოხდენილი, მაგრამ მსგავსი შემთხვევა არასდროს გვქონია.“
ხელისუფლების ცნობით, ჩიბაში, რომელიც დედაქალაქ ტოკიოს გვერდით მდებარეობს, 13 აგვისტოს შუადღიდან 1 საათში 100 მმ-ზე მეტი ნალექი მოვიდა.
ეს დაახლოებით სამჯერ აღემატება აგვისტოში საშუალო ნალექების რაოდენობას და ქვეყანაში დაფიქსირებული ნალექების ყველაზე მაღალი რაოდენობაა.
კუმაგაიმ დასძინა, რომ ხელისუფლება სიცოცხლის გადარჩენას პრიორიტეტს მიანიჭებს და სამაშველო სამუშაოებს გააგრძელებს.
საზოგადოებრივი მაუწყებლის NHK-ის, საინფორმაციო სააგენტო Kyodo-ს და გაზეთ Asahi-ს ცნობით, დაღუპულია სულ მცირე ექვსი ადამიანი.
ხელისუფლების ცნობით, დაღუპულებს შორის იყო ქალი, რომელიც დატბორილ გზაზე ჩაძირულ მანქანაში გარდაიცვალა. კიდევ ორი ადამიანი ქუჩაში დაეცა და მოგვიანებით გარდაიცვალა.
იაპონიის მეტეოროლოგიურმა სააგენტომ სიტუაციას „უპრეცედენტო დონის ძლიერი წვიმა“ უწოდა.
14 აგვისტოს, დილით რამდენიმე რკინიგზის მოძრაობა შეჩერებულია, ასევე დაკეტილია რამდენიმე მთავარი მაგისტრალი.
13 აგვისტოს, 100 000-ზე მეტ ოჯახს ევაკუაცია მოსთხოვეს მას შემდეგ, რაც წვიმამ მეწყერი და ელექტროენერგიის გათიშვა გამოიწვია.
ნარიტას აეროპორტის პრესსპიკერის თქმით, 14 აგვისტოს ყველა რეისი ჩვეულებრივად შესრულდება. ფლაგმანურმა ავიაკომპანია „იაპონიის ავიახაზებმა“ განაცხადა, რომ შესაძლოა მისი ზოგიერთი რეისი გადაიდოს, თუმცა გაუქმებას არ ელის.
მგზავრები მეტროს სადგურებში იყვნენ ჩარჩენილები, ხოლო დაახლოებით 1800-მა ადამიანმა ღამე ჩიბას პრეფექტურის მთავრობის შენობაში გაატარა.
ჩიბას ქალაქ იჩიკავაში მცხოვრებმა ქალმა NHK-ს განუცხადა, რომ წვიმა „უეცრად დაიწყო, ამიტომ ეს სრული სიურპრიზი იყო“.
„ელექტროენერგია გაითიშა, ამიტომ ვნერვიულობ, შევძლებ თუ არა ჩემი ბიზნესის გახსნას მომდევნო რამდენიმე დღეში“, – თქვა მან.
ამასობაში, ფილიპინებში, წყალდიდობის საფრთხის გამო, ხელისუფლებამქვეყნის ჩრდილოეთის უმეტეს ნაწილში კვლავ დახურა სკოლები და სამთავრობო უწყებები.
ამ კვირის დასაწყისში იაპონიას, ფილიპინებსა და ჩინეთს ზედიზედ ორი შტორმი – „დელფინი“, „ჩან-ჰომი“ და „პეილოუ“ – ერთდროულად დაატყდა თავს.
იაპონიის კუნძულ ოკინავაზე „დელფინმა“ ძლიერი წვიმა მოიტანა, რის გამოც ათიათასობით შენობას ელექტროენერგია შეუწყდა, წაიქცა ხეები და გაუქმდა ფრენები.
შაბათ-კვირის განმავლობაში ჩინეთის ხელისუფლებამ მილიონზე მეტი ადამიანი ევაკუაცია განახორციელა საკუთარი სახლებიდან. ჩინეთში ყველაზე ძლიერი ტაიფუნი „დელფინი“ ქვეყნის აღმოსავლეთ ნაწილს დაატყდა თავს.